வாணியம்பாடி அருகே 21 பயனாளிகளுக்கு ரூ.3.19 லட்சம் மதிப்பிலான அரசு நலத்திட்ட உதவிகள்!
வாணியம்பாடி அருகே 21 பயனாளிகளுக்கு ரூ.3.19 லட்சம் மதிப்பிலான அரசு நலத்திட்ட உதவிகள்!
வாணியம்பாடி, அக்.23- திருப்பத்தூர் மாவட்டம், வாணியம்பாடி அருகே ‘உங்களைத் தேடி உங்கள் ஊரில்’ திட்டத்தின் கீழ், 21 பயனாளிகளுக்கு 3 லட்சத்து 19 ஆயிரம் ரூபாய் மதிப்பிலான அரசு நலத்திட்ட உதவிகளை மாவட்ட ஆட்சியர் வழங்கினார்.
திருப்பத்தூர் மாவட்டம், வாணியம்பாடி அடுத்த வளையாம்பட்டு பகுதியில் உள்ள தனியார் திருமண மண்டபத்தில், அனைத்து துறை அலுவலர்களுடனான ஆய்வுக் கூட்டம் நடைபெற்றது.
இதில், மாவட்ட ஆட்சியர் வே.நல்லசிவன் மற்றும் வாணியம்பாடி சட்டமன்ற உறுப்பினர் எஸ்.எஸ்.பி.சையத் பாரூக் பாஷா ஆகியோர் கலந்து கொண்டு, பல்வேறு அரசுத் துறைகளின் சார்பில் 21 பயனாளிகளுக்கு மொத்தம் 3 லட்சத்து 19 ஆயிரம் ரூபாய் மதிப்பிலான அரசு நலத்திட்ட உதவிகளை வழங்கினர்.
நிகழ்ச்சியில், மாவட்ட வருவாய் அலுவலர் இரா.பாலசுப்ரமணியன், மாவட்ட ஊரக வளர்ச்சி முகமை திட்ட இயக்குநர் தமிழரசி, தனித்துணை ஆட்சியர் பூஷண குமார், வாணியம்பாடி வருவாய் கோட்டாட்சியர் சிவக்குமார் உள்ளிட்ட பல்வேறு துறை அரசு அலுவலர்கள் கலந்து கொண்டனர்.
