கந்திலி அருகே குடியிருப்புப் பகுதியில் கழிவுநீர் தேக்கம்! நோய்த்தொற்று அபாயத்தால் பொதுமக்கள் அவதி.

கந்திலி அருகே குடியிருப்புப் பகுதியில் கழிவுநீர் தேக்கம்! நோய்த்தொற்று அபாயத்தால் பொதுமக்கள் அவதி.

அக்.25- திருப்பத்தூர் மாவட்டத்தில் கடந்த சில நாட்களாக தொடர்ந்து கனமழை பெய்து வரும் நிலையில், சுந்தரம்பள்ளி காலனி பகுதியில் மழைநீருடன் கழிவுநீர் கலந்து வீடுகளைச் சுற்றிலும் தேங்கி நிற்கிறது.மேலும், தேங்கியுள்ள கழிவுநீர் வீடுகளுக்குள் புகுவதால், விஷப்பூச்சிகளின் நடமாட்டம் அதிகரித்துள்ளதாகவும், தேங்கிய நீரால் கொசுக்கள் உற்பத்தியாகி டெங்கு, மலேரியா உள்ளிட்ட நோய்கள் பரவும் அபாயம் உள்ளதாக அப்பகுதி மக்கள் அச்சம் அடைந்து வருகின்றனர்.ஏற்கெனவே பயன்பாட்டில் இருந்த கழிவுநீர் கால்வாய் அடைக்கப்பட்டதே இந்தப் பிரச்சினைக்குக் காரணம் எனக் கூறும் பொதுமக்கள், இதுகுறித்து சம்பந்தப்பட்ட அதிகாரிகளிடம் பலமுறை புகார் தெரிவித்தும் இதுவரை எந்த நடவடிக்கை எடுக்கப்படவில்லை.ஆகையால் பொதுமக்களின் நலனைக் கருத்தில் கொண்டு, தேங்கியுள்ள கழிவுநீரை உடனடியாக அகற்றுவதுடன், அடைக்கப்பட்டுள்ள கழிவுநீர் கால்வாயைச் சீரமைத்து, முறையான கழிவுநீர் கால்வாய் மற்றும் மழைநீர் வடிகால் வசதிகளை ஏற்படுத்தித் தர வேண்டும் என அப்பகுதி மக்கள் கோரிக்கை விடுத்துள்ளனர்.பருவமழை தொடர்ந்து பெய்து வரும் நிலையில், நோய்த்தொற்று அபாயத்தைத் தடுக்கவும், பொதுமக்களின் சுகாதாரத்தைப் பாதுகாக்கவும் சம்பந்தப்பட்ட துறை அதிகாரிகள் விரைந்து நடவடிக்கை எடுப்பார்களா என்பதே அப்பகுதி மக்களின் எதிர்பார்ப்பாக உள்ளது.