ஆம்பூரில் கிராவல் மண் ஏற்றிச் சென்ற லாரியைச் சிறைபிடித்து பொதுமக்கள் போராட்டம். சாலைகள் சேதமடைவதாகவும், போக்குவரத்து நெரிசல் ஏற்படுவதாகவும் புகார்!

ஆம்பூரில் கிராவல் மண் ஏற்றிச் சென்ற லாரியைச் சிறைபிடித்து பொதுமக்கள் போராட்டம். சாலைகள் சேதமடைவதாகவும், போக்குவரத்து நெரிசல் ஏற்படுவதாகவும் புகார்!

அக்.13- திருப்பத்தூர் மாவட்டம், ஆம்பூர் கம்பிகொல்லை பகுதியில் உள்ள தனியார் மண் குவாரியில் இருந்து கிராவல் மண் ஏற்றிச் சென்ற லாரியைச் சிறைபிடித்து, அப்பகுதி பொதுமக்கள் போராட்டத்தில் ஈடுபட்டனர்.

ஆம்பூர் நகராட்சிக்கு உட்பட்ட கம்பிகொல்லை பகுதியில் தனியாருக்குச் சொந்தமான நிலத்தில் மண் குவாரி இயங்கி வருகிறது. இந்தக் குவாரியில் இருந்து தினந்தோறும் ஏராளமான லாரிகள் மூலம் அதிக அளவில் கிராவல் மண் எடுத்துச் செல்லப்படு வருகிறது.

இதனால், அப்பகுதியில் உள்ள சாலைகள் சேதமடைந்து குண்டும் குழியுமாக மாறியுள்ளதாகவும், கடும் போக்குவரத்து நெரிசல் ஏற்படுவதாகவும் குற்றம்சாட்டிய பொதுமக்கள், குவாரியில் இருந்து கிராவல் மண் ஏற்றிச் சென்ற லாரியைச் சிறைபிடித்து போராட்டத்தில் ஈடுபட்டனர்.

தகவலறிந்து சம்பவ இடத்திற்கு வந்த ஆம்பூர் துணைக் காவல் கண்காணிப்பாளர் நாகலிங்கம் மற்றும் வருவாய்த் துறையினர், போராட்டத்தில் ஈடுபட்டவர்களிடம் பேச்சுவார்த்தை நடத்தி கோரிக்கைகள் மீது உரிய நடவடிக்கை எடுக்கப்படும் என அதிகாரிகள் உறுதியளித்ததைத் தொடர்ந்து, பொதுமக்கள் போராட்டத்தைக் கைவிட்டுக் கலைந்து சென்றனர்.

இதனால் அப்பகுதியில் சிறிது நேரம் போக்குவரத்து பாதிக்கப்பட்டு பரபரப்பு நிலவியது.