நாட்றம்பள்ளி அருகே மல்லப்பள்ளி கிராமத்தில் மக்கள் தொடர்பு முகாம் – 135 பயனாளிகளுக்கு ரூ.1.73 கோடி மதிப்பிலான அரசு நலத்திட்ட உதவிகள்!

நாட்றம்பள்ளி அருகே மல்லப்பள்ளி கிராமத்தில் மக்கள் தொடர்பு முகாம் – 135 பயனாளிகளுக்கு ரூ.1.73 கோடி மதிப்பிலான அரசு நலத்திட்ட உதவிகள்!

அக்.14- திருப்பத்தூர் மாவட்டம், நாட்றம்பள்ளி அடுத்த மல்லப்பள்ளி கிராமத்தில் மக்கள் தொடர்பு முகாம் அரசு உயர்நிலைப் பள்ளி வளாகத்தில் நடைபெற்றது.

முகாமிற்கு மாவட்ட ஆட்சியர் வே. நல்லசிவன் தலைமை வகித்தார்.

ஜோலார்பேட்டை சட்டமன்ற உறுப்பினர் கே.சி. ரமேஷ் முன்னிலை வகித்தார்.

முகாமில், பல்வேறு அரசுத் துறைகளின் சார்பில் மொத்தம் 135 பயனாளிகளுக்கு ரூ.1 கோடியே 73 லட்சத்து 48 ஆயிரத்து 426 மதிப்பிலான அரசு நலத்திட்ட உதவிகள் வழங்கப்பட்டன.

முகாமில் பட்டா மாற்றம், இலவச வீட்டுமனைப் பட்டா, வருவாய்த் துறை சான்றிதழ்கள், இயற்கை மரண நிவாரண உதவி, மகளிர் நலத்திட்ட உதவிகள், தொழிலாளர் நலத்துறை உதவிகள், மாற்றுத்திறனாளிகள் நலத்திட்ட உதவிகள் மற்றும் வேளாண்மைத் துறை சார்ந்த உதவிகள் உள்ளிட்ட பல்வேறு நலத்திட்டங்கள் பயனாளிகளுக்கு மாவட்ட ஆட்சியர் வழங்கினார்.

இதனைத் தொடர்ந்து, பொதுமக்களிடமிருந்து பெறப்பட்ட 370 கோரிக்கை மனுக்களும் சம்பந்தப்பட்ட துறை அலுவலர்களிடம் வழங்கப்பட்டு, உரிய விசாரணை மேற்கொண்டு தகுதியின் அடிப்படையில் நடவடிக்கை எடுக்க அறிவுறுத்தப்பட்டது.

நிகழ்ச்சியில் மாவட்ட வருவாய் அலுவலர் இரா. பாலசுப்ரமணியன், மாவட்ட ஊரக வளர்ச்சி முகமை திட்ட இயக்குநர் செள. தமிழரசி மற்றும் பல்வேறு அரசுத் துறை அலுவலர்கள், உள்ளாட்சிப் பிரதிநிதிகள், பொதுமக்கள் கலந்து கொண்டனர்.