திருப்பத்தூர் மாவட்டம் ஜோலார்பேட்டை ஒன்றியத்தில் பல்வேறு வளர்ச்சித் திட்டப் பணிகள் – மாவட்ட ஆட்சியர் நேரில் ஆய்வு.

திருப்பத்தூர் மாவட்டம் ஜோலார்பேட்டை ஒன்றியத்தில் பல்வேறு வளர்ச்சித் திட்டப் பணிகள் – மாவட்ட ஆட்சியர் நேரில் ஆய்வு.

அக்.14- திருப்பத்தூர் மாவட்டம், ஜோலார்பேட்டை ஊராட்சி ஒன்றியத்திற்குட்பட்ட வெலக்கல்நத்தம் ஊராட்சியில், பொதுமக்களின் கோரிக்கைகள் தொடர்பாக மேற்கொள்ளப்பட்டு வரும் பல்வேறு வளர்ச்சித் திட்டப் பணிகளை மாவட்ட ஆட்சியர் வே.நல்லசிவன் நேரில் பார்வையிட்டு ஆய்வு செய்தார்.

வெலக்கல்நத்தம் ஊராட்சியில் பொதுமக்களின் அடிப்படை வசதிகள் தொடர்பான கோரிக்கைகள் குறித்து அதிகாரிகளிடம் கேட்டறிந்த மாவட்ட ஆட்சியர், பொதுமக்களுக்கு வழங்கப்படும் குடிநீர் வசதி, திடக்கழிவு மேலாண்மை, சுகாதார வசதிகள் மற்றும் கிராம இணைப்புச் சாலைகள் உள்ளிட்ட அடிப்படை வசதிகள் தொடர்பான தேவைகள் குறித்து ஆய்வு மேற்கொண்டார்.

தொடர்ந்து, ஊராட்சி ஒன்றிய தொடக்கப்பள்ளியில் ஆய்வு மேற்கொண்ட மாவட்ட ஆட்சியர், மாணவர்களின் வருகைப் பதிவு, கல்வித் தரம் மற்றும் அடிப்படை வசதிகள் குறித்து பார்வையிட்டார். மேலும், மாணவர்களுடன் கலந்துரையாடி, கல்வியில் சிறந்து விளங்க வேண்டும் என அறிவுறுத்தினார்.

அங்கன்வாடி மையத்திலும் ஆய்வு மேற்கொண்ட அவர், குழந்தைகளுக்கு வழங்கப்படும் ஊட்டச்சத்து உணவின் தரம், குழந்தைகளின் வருகை, பராமரிப்பு மற்றும் சுகாதார வசதிகள் குறித்து கேட்டறிந்தார்.

மேலும், மகாத்மா காந்தி தேசிய ஊரக வேலை உறுதித் திட்டத்தின் கீழ் ரூ.5.96 லட்சம் மதிப்பீட்டில் கட்டப்பட்டு வரும் கற்றல் கற்பித்தல் மையக் கட்டிடப் பணிகளையும் மாவட்ட ஆட்சியர் ஆய்வு செய்தார். கட்டிடத்தின் அடித்தளப் பணிகள் நிறைவடைந்துள்ளதையும், தூண்கள் அமைக்கப்பட்டு லிண்டல் மட்டத்திற்கு உயர்த்தும் பணிகள் மற்றும் செங்கல் சுவர் அமைக்கும் பணிகள் நடைபெற்று வருவதையும் பார்வையிட்டு, கட்டுமானப் பணிகளைத் தரமாகவும் விரைந்து முடிக்கவும் அறிவுறுத்தினார்.

ஆய்வின்போது, மாவட்ட ஊரக வளர்ச்சி முகமை திட்ட இயக்குநர் தமிழரசி, ஊராட்சிகள் உதவி இயக்குநர் எஸ்.அருணாசலம், ஜோலார்பேட்டை வட்டார வளர்ச்சி அலுவலர்கள் ஜெ.மணவாளன், ரஷாத் பாஷா மற்றும் ஊராட்சி மன்றத் தலைவர் ராமசாமி உள்ளிட்ட அரசு அலுவலர்கள் உடனிருந்தனர்.