திருப்பத்தூர் ஒன்றியத்தில் பல்வேறு வளர்ச்சிப் பணிகளை மாவட்ட ஆட்சியர் நேரில் ஆய்வு!

திருப்பத்தூர் ஒன்றியத்தில் பல்வேறு வளர்ச்சிப் பணிகளை மாவட்ட ஆட்சியர் நேரில் ஆய்வு!

அக்.28- திருப்பத்தூர் மாவட்டம் திருப்பத்தூர் ஊராட்சி ஒன்றியம், ஏழராம்பட்டி ஊராட்சியில் உள்ள ஊராட்சி ஒன்றிய தொடக்கப்பள்ளியில் முதலமைச்சரின் காலை உணவுத் திட்டத்தின் செயல்பாடுகளை மாவட்ட ஆட்சியர் ஆய்வு செய்தார். அப்போது, மாணவ, மாணவியர்களுக்கு வழங்கப்படும் காலை உணவின் தரம் மற்றும் உணவு தயாரிக்கும் முறைகள் குறித்து கேட்டறிந்தார்.

தொடர்ந்து, ஏழராம்பட்டி பகுதியில் ஊரக வளர்ச்சி மற்றும் ஊராட்சித் துறை சார்பில் அமைக்கப்பட்டுள்ள வட்டார நாற்றங்கால் பண்ணையைப் பார்வையிட்டார். அங்கு கொய்யா, மா உள்ளிட்ட பல்வேறு வகையான மரக்கன்றுகள் வளர்க்கப்படுவதை ஆய்வு செய்தார். மரக்கன்றுகளை உரிய உயரம் மற்றும் தரத்துடன் வளர்ப்பதற்கும், போதிய இடைவெளியில் முறையாகப் பராமரிப்பதற்கும், இயற்கை உரங்களைப் பயன்படுத்தி செடிகளை வளர்ப்பதற்கும் சம்பந்தப்பட்ட அலுவலர்களுக்கு அறிவுறுத்தினார்.

இதனைத் தொடர்ந்து, அங்கே அமைக்கப்பட்டுள்ள மண்புழு உரக்கூடத்தையும் பார்வையிட்டு ஆய்வு செய்தார். அங்கு மண்புழு உரம் தயாரிக்கும் முறைகள், உரக்கூடத்தின் செயல்பாடுகள் மற்றும் அதன் பயன்பாடுகள் குறித்து கேட்டறிந்தார். மேலும், இயற்கை உரமான மண்புழு உரம் தயாரிப்பை அதிகரிப்பதுடன், அதன் பயன்பாட்டை ஊக்குவிக்கத் தேவையான நடவடிக்கைகளை மேற்கொள்ளுமாறு சம்பந்தப்பட்ட அலுவலர்களுக்கு அறிவுறுத்தினார்.ஆய்வின்போது, மாவட்ட ஊரக வளர்ச்சி முகமை திட்ட இயக்குநர் தமிழரசி மற்றும் தொடர்புடைய துறை அலுவலர்கள் உடனிருந்தனர்.