தேசிய இரத்ததான தினத்தை முன்னிட்டு இரத்தக் கொடையாளர்களுக்கு பாராட்டு.

அக்.2- தேசிய இரத்ததான தினத்தை முன்னிட்டு, திருப்பத்தூர் மாவட்ட ஆட்சியர் அலுவலக வளாகத்தில் மாவட்ட எய்ட்ஸ் தடுப்பு மற்றும் கட்டுப்பாட்டு அலகு சார்பில் சிறப்பு நிகழ்ச்சி நடைபெற்றது.

நிகழ்ச்சியில், தொடர்ந்து இரத்ததானம் செய்து வரும் 45 இரத்தக் கொடையாளர்களுக்கும், இரத்ததான முகாம்களை சிறப்பாக நடத்தி வரும் 40 முகாம் அமைப்பாளர்களுக்கும், இரத்த வங்கி ஆய்வக பணியாளர்களுக்கும் பாராட்டு சான்றிதழ் மற்றும் கேடயங்களை மாவட்ட ஆட்சியர் வே. நல்லசிவன் வழங்கி கவுரவித்தார்.

நிகழ்ச்சியில் மாவட்ட வருவாய் அலுவலர் இரா. பாலசுப்ரமணியன், மருத்துவம் மற்றும் ஊரக நலப்பணிகள் இணை இயக்குநர் மரு. ஞானமீனாட்சி, மாவட்ட சுகாதார அலுவலரும் எய்ட்ஸ் கட்டுப்பாட்டு அலுவலருமான மரு. நா. கலுசிவலிங்கம் உள்ளிட்ட மருத்துவத்துறை அதிகாரிகள் கலந்து கொண்டனர்.

மேலும், திருப்பத்தூர், ஆம்பூர் மற்றும் வாணியம்பாடி இரத்த வங்கி மருத்துவ அலுவலர்கள், ஐசிடிசி பணியாளர்கள், இரத்த வங்கி பணியாளர்கள், தொண்டு நிறுவன பிரதிநிதிகள் மற்றும் சம்பந்தப்பட்ட துறை அலுவலர்கள் பங்கேற்றனர்.

உயிரைக் காக்கும் உன்னத சேவையான இரத்ததானத்தை தொடர்ந்து வழங்கி வரும் கொடையாளர்களை பாராட்டி கவுரவித்தது நிகழ்ச்சியின் முக்கிய அம்சமாக அமைந்தது.