திருப்பத்தூர் அடுத்த புதூர் நாடு மலைப்பகுதியில் வீட்டிற்குள் புகுந்து இளம்பெண்ணிடம் பாலியல் அத்துமீறலில் ஈடுபட முயன்ற 43 வயது நபர் கைது.

திருப்பத்தூர் மாவட்டம்.அக்.7-

திருப்பத்தூர் மாவட்டம் திருப்பத்தூர் அடுத்த புதூர் நாடு மலைப்பகுதியில், வீட்டிற்குள் அத்துமீறி நுழைந்து 19 வயது இளம்பெண்ணிடம் பாலியல் அத்துமீறலில் ஈடுபட முயன்ற 43 வயது நபர் கைது செய்யப்பட்டு சிறையில் அடைக்கப்பட்டார்.

புதூர் நாடு மலைப்பகுதியைச் சேர்ந்த 19 வயது இளம்பெண், தனது தம்பி, தங்கைகளுடன் வீட்டில் தூங்கிக் கொண்டிருந்தார்.

அப்போது வீட்டிற்குள் புகுந்த மர்ம நபர் ஒருவர், இளம்பெண்ணிடம் பாலியல் அத்துமீறலில் ஈடுபட முயன்றதாக கூறப்படுகிறது. இதனால் அதிர்ச்சியடைந்த இளம்பெண் கூச்சலிட்டுள்ளார்.அவரது சத்தத்தைக் கேட்டு அந்த நபர் அங்கிருந்து தப்பி ஓடியுள்ளார்.

இதுகுறித்து இளம்பெண் திருப்பத்தூர் அனைத்து மகளிர் காவல் நிலையத்தில் புகார் அளித்தார். புகாரின் பேரில் போலீசார் வழக்குப்பதிவு செய்து விசாரணை மேற்கொண்டனர்.

விசாரணையில், புதூர் நாடு தகரக்குப்பம் பகுதியைச் சேர்ந்த காளியப்பன் என்பவரது மகன் குரங்குகாளி, 43, என்பவர் சம்பவத்தில் ஈடுபட்டதாக போலீசார் விசாரணையில் தெரியவந்தது.

இதையடுத்து அவரை கைது செய்த போலீசார், நீதிமன்றத்தில் ஆஜர்படுத்தி சிறையில் அடைத்தனர்.