வாணியம்பாடி அருகே இடி, மின்னல் தாக்கி 7 ஆடுகள் பலி – பெண் படுகாயம்!

வாணியம்பாடி அருகே இடி, மின்னல் தாக்கி 7 ஆடுகள் உயிரிழப்பு – பெண் படுகாயம்!

வாணியம்பாடி, நவ.5- திருப்பத்தூர் மாவட்டம், வாணியம்பாடி அருகே இடி, மின்னல் தாக்கியதில் 7 ஆடுகள் உயிரிழப்பு. ஆடு மேய்த்துக் கொண்டிருந்த பெண் படுகாயமடைந்து அரசு மருத்துவமனையில் அனுமதிக்கப்பட்டார்.

வாணியம்பாடி அடுத்த பரவக்குட்டை அருகே கரிகாலன்கொட்டை பகுதியில், காப்புக்காட்டையொட்டிய விவசாய நிலத்தில் அதே பகுதியைச் சேர்ந்த லட்சுமி என்பவர் நேற்று தனக்குச் சொந்தமான ஆடுகளை மேய்த்துக் கொண்டிருந்தார்.

அப்போது அப்பகுதியில் கனமழை பெய்த நிலையில், திடீரென இடி, மின்னல் தாக்கியுள்ளது. இதில் அங்கு மேய்ந்து கொண்டிருந்த 7 ஆடுகளும் சம்பவ இடத்திலேயே உயிரிழந்தன.

மேலும், ஆடு மேய்த்துக் கொண்டிருந்த லட்சுமி படுகாயமடைந்தார்.

தகவலறிந்து சம்பவ வந்த அவரது உறவினர்கள், லட்சுமியை ஆம்புலன்ஸ் மூலம் மீட்டு திருப்பத்தூர் அரசு மருத்துவமனைக்கு கொண்டு சென்றனர். அங்கு அவருக்கு தீவிர சிகிச்சை அளிக்கப்பட்டு வருகிறது.

இடி, மின்னல் தாக்கி ஒரே நேரத்தில் 7 ஆடுகள் உயிரிழந்ததுடன், பெண் ஒருவர் படுகாயமடைந்த சம்பவம் அப்பகுதியில் பெரும் சோகத்தையும் பரபரப்பையும் ஏற்படுத்தியுள்ளது.