வாணியம்பாடி அருகே கல்லறைத் திருநாள் – கிறிஸ்தவர்கள் சிறப்பு வழிபாடு!

வாணியம்பாடி அருகே கல்லறைத் திருநாள் – கிறிஸ்தவர்கள் சிறப்பு வழிபாடு!

இறந்த உறவினர்களின் கல்லறைகளில் மெழுகுவர்த்தி ஏற்றி, மலர்களால் அலங்கரித்து அஞ்சலி.

வாணியம்பாடி, நவ.2- திருப்பத்தூர் மாவட்டம், வாணியம்பாடி அடுத்த உதயேந்திரம் தூய நெஞ்ச ஆண்டவர் ஆலய கல்லறைத் தோட்டத்தில், அனைத்து ஆன்மாக்களின் நாளான கல்லறைத் திருநாளையொட்டி கிறிஸ்தவர்கள் சிறப்பு வழிபாடு நடத்தினர்.

இதையொட்டி, கல்லறைத் தோட்டத்தில் உள்ள தங்களது இறந்த உறவினர்களின் கல்லறைகளைச் சுத்தம் செய்து, புதிய வண்ணங்கள் தீட்டி அலங்கரித்தனர்.தொடர்ந்து, மாலையில் பங்குத்தந்தை அந்தோணிமாறன் தலைமையில், அருட்தந்தையர்கள் ஞானசேகர், அல்போன்ஸ், டெல்சன் ஆகியோர் இணைந்து நடத்திய பாடற்திருப்பலியும் சிறப்பு வழிபாடும் நடைபெற்றது.இதில், இறந்துபோன தங்களது பெற்றோர், உறவினர்கள் மற்றும் நண்பர்களின் ஆன்மா சாந்தியடைய வேண்டி கிறிஸ்தவர்கள் பிரார்த்தனை செய்தனர். மேலும், அவர்களது கல்லறைகளில் மெழுகுவர்த்தி ஏற்றி, மலர்களால் அலங்கரித்து அஞ்சலி செலுத்தினர்.இதேபோல், வாணியம்பாடி கோணாமேடு சகாயமாதா ஆலய கல்லறைத் தோட்டத்திலும் கிறிஸ்தவர்கள் கல்லறைத் திருநாள் வழிபாடு நடத்தினர்.