திருப்பத்தூரில் குழந்தைகள் பாதுகாப்புப் பயிற்சி: கிராம நிர்வாக அலுவலர்கள், ஊராட்சி செயலாளர்களுக்கு ஆட்சியர் அறிவுரை

திருப்பத்தூர் மாவட்டத்தில் கிராம நிர்வாக அலுவலர்கள், ஊராட்சி செயலாளர்களுக்கு குழந்தைகள் பாதுகாப்பு குறித்த பயிற்சி!குழந்தை திருமணம், போக்சோ சட்டம் உள்ளிட்டவை குறித்து ஆட்சியர் வே.நல்லசிவன் அறிவுரை!

அக்.30- திருப்பத்தூர் மாவட்ட ஆட்சியர் அலுவலக கூட்டரங்கில், கிராம நிர்வாக அலுவலர்கள் மற்றும் ஊராட்சி செயலாளர்களுக்கான குழந்தைகள் பாதுகாப்பு குறித்த திறன் வளர்ப்புப் பயிற்சி நடைபெற்றது.மாவட்ட ஆட்சியர் வே.நல்லசிவன் தலைமையில் நடைபெற்ற இந்தப் பயிற்சியில், குழந்தைகள் நலன் மற்றும் சிறப்புச் சேவைகள் துறை சார்பில், குழந்தைத் திருமணம், இளவயது கர்ப்பம் மற்றும் குழந்தைகளுக்கு எதிரான துன்புறுத்தல்களைத் தடுப்பது குறித்து எடுத்துரைக்கப்பட்டது.மேலும், கிராம அளவில் குழந்தைகள் பாதுகாப்புக் குழுக்களைச் சிறப்பாகச் செயல்படுத்துவது குறித்தும் பயிற்சி அளிக்கப்பட்டது.தொடர்ந்து, குழந்தைத் திருமணத் தடுப்புச் சட்டம், போக்சோ சட்டம் உள்ளிட்ட சட்டங்கள் குறித்தும், குழந்தைகளுக்கு எதிரான சம்பவங்கள் குறித்து தகவல் கிடைத்தவுடன் உடனடியாகப் புகார் அளித்து நடவடிக்கை மேற்கொள்வது குறித்தும் விளக்கப்பட்டது.அனைத்து கிராமங்களிலும் குழந்தைகள் பாதுகாப்புக் குழுக் கூட்டங்களை மூன்று மாதங்களுக்கு ஒருமுறை தவறாமல் நடத்த வேண்டும் என்றும், குழந்தைகள் பாதுகாப்பு தொடர்பான விழிப்புணர்வை ஏற்படுத்த வேண்டும் என்றும் மாவட்ட ஆட்சியர் அறிவுறுத்தினார்.மேலும், குழந்தைகள் கடத்தல் இல்லாத கிராமங்களை உருவாக்குவதற்குத் தேவையான நடவடிக்கைகளை மேற்கொள்ளவும், குழந்தைத் தொழிலாளர் முறை மற்றும் பள்ளி இடைநிற்றலை முற்றிலும் ஒழிக்கவும், கிராம நிர்வாக அலுவலர்கள் மற்றும் ஊராட்சி செயலாளர்கள் ஒருங்கிணைந்து செயல்பட வேண்டும் எனக் கேட்டுக்கொண்டார்.இந்தக் கூட்டத்தில் மாவட்ட வருவாய் அலுவலர் இரா.பாலசுப்ரமணியன், மாவட்ட குழந்தைகள் பாதுகாப்பு அலுவலர் உமா மகேஸ்வரி, மாவட்ட சுகாதார அலுவலர் நா.கஸ்தூரிகா மற்றும் பல்வேறு துறை அலுவலர்கள் கலந்து கொண்டனர்.