ஆம்பூரில் அனுமதியின்றி குடோனில் பதுக்கி வைக்கப்பட்டிருந்த சுமார் 10 லட்சம் ரூபாய் மதிப்பிலான பட்டாசுகள் பறிமுதல். ஒழுங்கமைக்கப்பட்ட குற்றப் புலனாய்வுப் பிரிவு போலீசார் நடவடிக்கை.

ஆம்பூரில் அனுமதியின்றி குடோனில் பதுக்கி வைக்கப்பட்டிருந்த சுமார் 10 லட்சம் ரூபாய் மதிப்பிலான பட்டாசுகள் பறிமுதல். ஒழுங்கமைக்கப்பட்ட குற்றப் புலனாய்வுப் பிரிவு போலீசார் நடவடிக்கை.

ஆம்பூர்- அக்.29- திருப்பத்தூர் மாவட்டம் ஆம்பூர் பைபாஸ் சாலையில் உள்ள கிருஷ்ணாபுரம் பகுதியில், கமல் என்பவருக்குச் சொந்தமான குடோனில் அனுமதியின்றி பட்டாசுகள் பதுக்கி வைக்கப்பட்டிருப்பதாக வேலூர் சரக ஒழுங்கமைக்கப்பட்ட குற்றப் புலனாய்வுப் பிரிவு போலீசாருக்கு ரகசியத் தகவல் கிடைத்தது.இதையடுத்து, ஆம்பூர் டி.எஸ்.பி. நாகலிங்கம் தலைமையில், வேலூர் சரக ஒழுங்கமைக்கப்பட்ட குற்றப் புலனாய்வுப் பிரிவு உதவி ஆய்வாளர்கள் இலியாஸ்கான், ரவி மற்றும் சிறப்பு உதவி ஆய்வாளர் ராதாகிருஷ்ணன் உள்ளிட்ட போலீசார் சம்பந்தப்பட்ட குடோனில் அதிரடியாகச் சோதனை மேற்கொண்டனர்.அப்போது, அங்கு 100 அட்டைப் பெட்டிகளில் அனுமதியின்றி பதுக்கி வைக்கப்பட்டிருந்த சுமார் 10 லட்சம் ரூபாய் மதிப்பிலான சிவகாசி பட்டாசுகளை போலீசார் பறிமுதல் செய்தனர்.மேலும், பட்டாசுகளைப் பதுக்கி வைத்திருந்ததாக ஆம்பூர் பைபாஸ் சாலை, விவேகானந்தர் இரண்டாவது தெரு பகுதியைச் சேர்ந்த ஸ்ரீனிவாசன் என்பவரிடம் போலீசார் விசாரணை மேற்கொண்டு வருகின்றனர்.இதற்கிடையே, ஆம்பூர் நகரம் மற்றும் சுற்றுவட்டாரப் பகுதிகளில் பல்வேறு இடங்களில் அனுமதியின்றிப் பட்டாசுகள் பதுக்கி வைக்கப்பட்டு விற்பனை செய்யப்படுவதாகக் கூறப்படும் நிலையில், இதுகுறித்து காவல்துறையினரும் குற்றப் புலனாய்வுப் பிரிவு போலீசாரும் தீவிரக் கண்காணிப்பு மேற்கொண்டு உரிய நடவடிக்கை எடுக்க வேண்டும் எனச் சமூக ஆர்வலர்கள் கோரிக்கை விடுத்துள்ளனர்.