திருப்பத்தூர் அருகே பெயிண்ட் கடையில் பயங்கர தீ விபத்து – ரூ.75 லட்சம் மதிப்பிலான பொருட்கள் தீயில் எரிந்து நாசம்!
திருப்பத்தூர் அருகே பெயிண்ட் கடையில் பயங்கர தீ விபத்து – ரூ.75 லட்சம் மதிப்பிலான பொருட்கள் தீயில் எரிந்து நாசம்!
நவ.7- திருப்பத்தூர் மாவட்டம் ஜோலார்பேட்டை அருகே, நள்ளிரவில் பெயிண்ட் கடையில் ஏற்பட்ட பயங்கர தீ விபத்தில், சுமார் 75 லட்சம் ரூபாய் மதிப்பிலான பெயிண்ட் மற்றும் இதர பொருட்கள் தீயில் எரிந்து நாசமாகின.
ஜோலார்பேட்டை அடுத்த மேல்அச்சமங்கலம் கிராமத்தைச் சேர்ந்த முருகன் (56) என்பவர், பாச்சல் கிராம மேம்பாலத்தின் கீழ் விஷ்ணு பிரியா சிமெண்ட் மற்றும் பெயிண்ட் கடை நடத்தி வருகிறார்.
இந்தக் கடையில் பெயிண்டுகள், சிமெண்ட் மூட்டைகள், சுண்ணாம்பு, டைல்ஸ் ஒட்டுவதற்குத் தேவையான மூலப்பொருட்கள் மற்றும் பெயிண்ட் கலக்கும் இயந்திரம் உள்ளிட்ட பல்வேறு பொருட்களை இருப்பு வைத்திருந்தார்.
இந்நிலையில், நள்ளிரவில் கடையில் ஏற்பட்ட மின்கசிவு காரணமாக திடீரென தீப்பற்றியுள்ளது. கடையில் இருந்த பெயிண்டுகள் தீப்பிடித்து மளமளவென எரியத் தொடங்கின.
இதனைக் கண்ட அப்பகுதியைச் சேர்ந்த பாலாஜி என்பவர், உடனடியாக திருப்பத்தூர் தீயணைப்புத் துறையினருக்குத் தகவல் தெரிவித்தார்.
தகவலின்பேரில் நிலைய அலுவலர் முருகன் தலைமையிலான தீயணைப்பு வீரர்கள் சம்பவ இடத்திற்கு விரைந்து சென்று, சுமார் இரண்டு மணி நேரம் போராடி தீயைக் கட்டுக்குள் கொண்டு வந்தனர்.
இருப்பினும், கடையில் இருந்த சுமார் 75 லட்சம் ரூபாய் மதிப்பிலான பெயிண்டுகள் மற்றும் இதர பொருட்கள் தீயில் எரிந்து முற்றிலும் நாசமாகின.
சம்பவம் குறித்து ஜோலார்பேட்டை போலீசார் வழக்குப் பதிவு செய்து விசாரணை மேற்கொண்டு வருகின்றனர்.
